Hatupatu and Kurangaituku

I a Hātupatu e mahi manu ana i te ngahere, ka kite ia i tētehi mea tino rerekē.  He wahine e tino rite nei ki te manu. He parirau i ōna ringa, he maikuku roa i ōna matimati, kāore hoki ōna ngutu tangata, heoi, he ngutu manu roa kē i whakamahi ai ia hei tao ki te mahi manu.

 

Kāore a Hātupatu i mōhio, heoi, i te whai rāua tahi i te manu kotahi.  Nāna, nā Hātupatu tana tao i whiu ka tōtika kē atu ai ki te ngutu roa o Kurangaituku, kaua ki te manu.  Nā reira a Hātupatu i oma atu ai i te mataku. Ahakoa tana tere, i mau tonu a Hātupatu i a Kurangaituku ka whakahokia atu ai ki tana ana.

 

Nā wai, nā wai, ka mōhio a Hātupatu ki te ingoa o te manu wahine me tana hiahia kia mauheretia tonuhia ia hei taonga pēnei i te taiaha, i te kiri-kurī, i te kahu rānei mō āke tonu atu.  

 

I tupu haere te aroha o Kurangaituku ki a Hātupatu i a ia e whāngai ana i a ia, heoi, kāore a Hātupatu i āhei ki te wehe i te ana.  I kai a Kurangaituku i ngā manu mata, ā, koirā hoki tāna i whāngai ai ki a Hātupatu hei kai māna, heoi, kāore noa iho ia i rata ki tērā momo kai, nō reira, he mea huna kē ērā kai kia kaua rawa ia e kai i te manu mata.  I ngā wā i wehe ai a Kurangaituku ki te mahi manu, ka tunua e Hātupatu ngā manu nāna tonu nei i huna hei kai māna e ora tonu ai ia.

 

Rā atu, rā mai, ka whakarērea a Hātupatu e Kurangaituku ki te mahi manu.  He mea whakaōhiti a Hātupatu kia kaua rawa ia e pūrere atu inā rā kāore noa iho e tawhiti tana noho i te ana.  Nā wai, nā wai, i uaua ake tā Kurangaituku mahi manu, nō reira, ka toko ake te whakaaro kia tawhiti ake tana haere ki te kimi manu hei kai māna, waihoki, he mea akiaki a Kurangaituku e Hātupatu kia pērā kei hiakai rāua i te korenga o ngā manu e tata ana hei kai mā rāua.

 

I tētehi rangi, i mōhio tonu a Hātupatu ka roa kē tā Kurangaituku mahi manu i te tawhiti o tana haere, nō reira, ka tīmata tana whakarite rautaki kia pūrere atu i te ana rā.  Ka whānakohia ngā kākahu me ngā taonga. I mōhio ia ka ātaahua tōna hanga i ngā kākahu rā i a ia e pūrere atu ana, heoi, i mua i tērā ka whakamahia tētehi o ngā taiaha ki te patu i ngā manu me ngā moko a Kurangaituku.  Whai muri tonu iho rā ka oma atu a Hātupatu.

 

He mea patu katoa ngā mōkai a Kurangaituku, hāunga rā tētehi i pūrere atu i te ana ki te kimi i tōna rangatira, i a Kurangaituku.  Ka tae te rongo ki a Kurangaituku, ā, ka tere tana hoki atu, heoi, i tana taenga ki reira, kua wehe kē a Hātupatu, kua kautahanga kē hoki tōna whare.

 

I mōhio kē a Kurangaituku kāore noa iho a Hātupatu i tino tawhiti, nō reira, ka tere tana whaiwhai i a ia.  Ahakoa hoki te wawe o tā Hātupatu pūrere atu, i mōhio tonu ia he tere ake te wahine manu weriweri i a ia, ā, ākene pea ka mau.  Kāore noa iho i roa ka tata ake te tawhiti i te tokorua rā kia tae rā anō a Kurangaituku ki a ia.

 

He toka i kitea rā e Hātupatu, nō reira, kotahi anake te whakaaro i toko ake ai, otirā, kia tuwhera i a ia te toka rā mā te karakia e uru ai ia ki roto, ā, ananā!  I tutuki. Ka tomokia te toka e haumaru ai ia i a Kurungaituku.

 

Ka hipa a Kurangaituku i te toka i a ia e hāmama atu ana ki a Hātupatu, heoi, ka noho wahangū tonu ia i roto i te toka kia ngū haere rā anō te reo tīwaha o Kurangaituku e mōhio ai ia kua tawhiti kē tana haere, kātahi ia ka puta i te toka.

 

Ka whakatika atu a Hātupatu ki tōna kāinga, engari, ka kitea anō ia ka whiu kōhatu ai a Kurangaituku e pōturi ake ai tā Hātupatu oma atu.  Tae rawa atu a Hātupatu ki te riu o Whakarewarewa ka pekengia ngā waiwera me ngā waiparu i a ia e aruhia ana. I mōhio pū a Hātupatu ki te āhua o ngā waiwera, heoi, kāore a Kurangaituku i paku mōhio i heke ai ia ki tētehi puna waiwera, mate atu ai ki reira.

 

Ka oma tonu a Hātupatu ki Rotorua, i reira kauria ai te moana ki Mokoia, ki te haumarutanga o ōna mātua