He mea whakatū te Hokowhitu-a-Tū 28 i te tau 1939 i te wā i tū ai te pakanga i Ūropi.  Nā Tā Apirana Ngata te Kāwanatanga o Aotearoa i akiaki kia whakaritea tētehi ope tauā Māori.

I tauwehea te ope nui o Te Hokowhitu-a-Tū ki ngā kamupene e whā i te āhua o te wāhi i ahu mai ai ngā hōia.  Ko Kamupene B ngā uri i ahu ai i Rotorua, i Taupō, i Te Waiariki me Pare Hauraki.

I whakaeke tuatahi atu Te Hokowhitu-a-Tū ki te kauhanga o te riri i Kirihi me Kiriti i te tau 1941.  I whakawāteahia rātau i Kiriti i te marama o Mei, ā, 140 ngā hōia o Te Hokowhitu-a-Tū i mate. 

Ka whawhai tonu ngā toa o Te Hokowhitu-a-Tū i Minquar Quaim, i Awhirika ki te Tonga i te marama o Hune, i El Alamein hoki i te marama o Oketopa, i te tau 1942.

I te marama o Mei, i te tau 1943, i whai wāhi Te Hokowhitu-a-Tū ki te kauhanga riri i te kōkiritanga o Takrouna, he tara toka, e rua rau mita te teitei i te koraha o Tunisia.  Ko Haihana Iti Haane Mānahi tētehi i whawhai mō te hemo tonu atu i taua pakanga i whakawhiwhia ai ia ki te Tohu Toanga Ahurei (DCM) ahakoa tonu ngā whakaaro o ētehi atu kia whakawhiwhia kēhia ia ki te Rīpeka Wikitōria (VC).

E rua tau Te Hokowhitu-a-Tū e whawhai ana ki ngā ope Tiamana i Itari mai i te marama o Hepetema o te tau 1943 ki te mutunga rā anō o te pakanga nui i te 2 o Mei, 1945. 

​

I hoki anō Te Hokowhitu-a-Tū ki Pōneke i te 23 o Hanuere, i te tau 1946, ā, mā runga tereina rātau i tae atu ai ki ō rātau marae huri noa.

Ahakoa kua ea te wāhi ki te Te Hokowhitu-a-Tū, ka ora tonu ia i ngā kōrero.  Ko te nuinga o ngā mate o ngā ope katoa o Ngāti Tūmatauenga o Aotearoa, ko ērā o Te Hokowhitu-a-Tū.

3578 ngā toa o Te Hokowhitu-a-Tū 28 i te pakanga rā i tū ai i te tau 1940 ki te tau 1945, 649 i mate i te kauhanga o te riri, otirā, kotahi toa ki ngā toa tokoono.